Ankara ərzaq böhranının qarşısının alınmasına töhfə vermək üçün mümkün olan bütün addımları atmağa hazırdır

Türkiyə Milli Müdafiə Nazirliyi Qara dənizdə “taxıl dəhlizi”nin fəaliyyətinin bərpası ehtimalı ilə bağlı yayılan xəbərləri şərh edib.

Naxçıvan televiziyası xəbər verir ki, qardaş ölkənin müdafiə nazirliyi “taxıl dəhlizi” ilə bağlı əvvəlki razılaşmanın Türkiyənin fəal vasitəçiliyi ilə əldə edildiyini və bunun dünyada ərzaq böhranının qarşısının alınmasına töhfə verdiyini xatırladıb.

“Bu gün yenidən “taxıl dəhlizi” mövzusu gündəmə gəlib. Lakin indiki mərhələdə bu məsələ ilə bağlı konkret qərar qəbul edilməyib. Ankara regional və qlobal səviyyədə sülhün təmin edilməsinə, eləcə də ərzaq böhranının qarşısının alınmasına töhfə vermək üçün mümkün olan bütün addımları atmağa hazırdır”, - deyə departament qeyd edib.

Türkiyə Müdafiə Nazirliyi ölkənin beşinci nəsil F-35 təyyarələri proqramına qayıtması məsələsində də Ankaranın mövqeyini açıqlayıb.

“ABŞ CATSAA qanunu çərçivəsində Türkiyəyə qarşı tətbiq etdiyi sanksiyaları ləğv edərsə, ölkəmiz F-35 proqramına qayıtmaq məsələsinə baxa bilər. Biz lap əvvəldən ABŞ rəsmilərinin bu addımını səhv adlandırırdıq. Məhdudiyyətlərin aradan qaldırılması Türkiyə ilə ABŞ arasında müdafiə sektorunda əməkdaşlığa təkan verəcək”, - deyə nazirlik Türkiyənin müttəfiqlərinin bir-birinə qarşı sanksiyalar tətbiq etməməli olduğunu dəfələrlə bəyan etdiyini vurğulayıb.