Ukraynanın Krivoy Roq şəhərinə raket zərbəsi nəticəsində 3 nəfər həlak olub

Rusiya ordusunun Ukraynanın Krivoy Roq şəhərinə raket zərbəsi nəticəsində üç nəfər həlak olub, 10-dan çox insan yaralanıb.

NTV  xəbər verir ki, bu barədə Dnepropetrovsk Regional Hərbi Administrasiyasının (ORMA) rəisi Aleksandr Qanja “Telegram”da yazıb.

O, raket zərbəsinin şəhərdəki sənaye infrastrukturuna dəydiyini bildirib.

Qanja yazıb: “Düşmən Krivoy Roqa raket zərbəsi endirib. Sənaye infrastrukturuna ziyan dəyib”.

Daha sonra Krivoy Roq Müdafiə Şurasının sədri Aleksandr Vilkul Rusiyanın raket zərbəsi nəticəsində üç nəfərin öldüyünü və 10-dan çox insanın yaralandığını bildirib. O qeyd edib: “Sənaye infrastrukturu obyektinə zərbə endirilib. Təəssüf ki, üç nəfər həlak olub. On nəfərdən çox insan yaralanıb. Yarlıların bəzilərinin vəziyyəti ağırdır, hamısı artıq xəstəxanalara aparılıb və əməliyyat olunur”.

Onun sözlərinə görə, müvafiq xidmətlər raket zərbəsinin nəticələrini aradan qaldırır.