NTV xəbər verir ki, Naxçıvan Muxtar Respublikasının maliyyə naziri Həsən İsmayılovun müvafiq əmrinə əsasən Əkbərov Məmmədnağı Asiman oğlu Naxçıvan Muxtar Respublikası Maliyyə Nazirliyinin Dövlət Maliyyə Nəzarəti İdarəsinin rəisi vəzifəsinə təyin olunub.
Fevralın 16-da Nazirlikdə Məmmədnağı Əkbərovun Dövlət Maliyyə Nəzarəti İdarəsinin rəisi vəzifəsinə təyin olunması ilə bağlı kollektivə rəsmi təqdimat mərasimi keçirilib. Təqdimat zamanı nazir Həsən İsmayılov İdarənin fəaliyyətinin daha da təkmilləşdirilməsi, maliyyə nəzarət mexanizmlərinin gücləndirilməsi və mövcud çağırışlara uyğunlaşdırılması istiqamətində müvafiq tapşırıqlar verib, Məmmədnağı Əkbərova fəaliyyətində uğurlar arzulayıb.
Məmmədnağı Əkbərov göstərilən etimada görə təşəkkürünü bildirib, üzərinə düşən vəzifələri məsuliyyətlə yerinə yetirəcəyini qeyd edib.
Qeyd edək ki, Məmmədnağı Əkbərov 28 oktyabr 1990-cı ildə Şərur rayonunda anadan olub. O, Naxçıvan Universitetində “İqtisadiyyatın hüquqi tənzimlənməsi” ixtisası üzrə bakalavr, Naxçıvan Dövlət Universitetində isə “İqtisadiyyatın tənzimlənməsi” ixtisası üzrə magistr təhsili alıb.
Əmək fəaliyyətinə 2014-cü ildə Naxçıvan Muxtar Respublikasının Maliyyə Nazirliyində başlayan Məmmədnağı Əkbərov sonrakı illərdə Naxçıvan Muxtar Respublikası İcbari Tibbi Sığorta üzrə Dövlət Agentliyində direktor müavini vəzifəsində çalışıb. 2024-cü ildən isə Naxçıvan Şəhər Maliyyə İdarəsinin rəisi vəzifələrini müvəqqəti icra edib.
NTV canlı
Radio canlı
Nuhçıxan