Naxçıvanda Ümummilli Lider Heydər Əliyevin anadan olmasının 103-cü ildönümünə həsr olunmuş dəyirmi masa təşkil olunub - FOTOLAR

NTV xəbər verir ki, Ümummilli Lider Heydər Əliyevin anadan olmasının 103-cü ildönümünə həsr olunmuş “Müasir Azərbaycanın Memarı - Ümummilli Lider Heydər Əliyev” mövzusunda dəyirmi masa təşkil olunub.

“Şəhərsalma və Memarlıq İli” çərçivəsində təşkil olunan dəyirmi masada Naxçıvan Şəhər İcra Hakimiyyəti başçısının müavini Gülxanım Orucova çıxış edərək bildirib ki, Ümummilli Lider Heydər Əliyev müasir Azərbaycan dövlətinin memarı kimi tariximizdə əbədi iz qoymuş dahi şəxsiyyətdir. O vurğulayıb ki, Ulu Öndər bütün həyatını xalqına sədaqətlə xidmətə həsr edərək ölkəmizin iqtisadi, sosial və mədəni inkişafının möhkəm təməllər üzərində qurulmasına nail olub, Azərbaycanın dünya birliyində layiqli yer tutması üçün misilsiz xidmətlər göstərib.

Qeyd olunub ki, Heydər Əliyevin uzaqgörən və məqsədyönlü siyasəti nəticəsində müstəqil dövlətçilik ənənələri möhkəmləndirilmiş, güclü iqtisadi, elmi və intellektual potensial formalaşdırılmışdır. Onun müəyyən etdiyi inkişaf strategiyası Azərbaycanın davamlı tərəqqisinin əsasını təşkil edir.
Gülxanım Orucova diqqətə çatdırıb ki, bu gün Ümummilli Liderin siyasi kursu Azərbaycan Respublikasının Prezidenti İlham Əliyevin rəhbərliyi ilə uğurla davam etdirilir. Bu siyasətin nəticəsi olaraq ölkəmiz böyük inkişaf yolu keçmiş, tarixi Zəfər qazanılaraq ərazi bütövlüyümüz bərpa olunmuş, işğaldan azad edilmiş torpaqlarda genişmiqyaslı bərpa və yenidənqurma işləri həyata keçirilir. Böyük Qayıdış proqramı çərçivəsində müasir şəhərsalma prinsiplərinə uyğun olaraq yeni yaşayış məntəqələrinin salınması isə dövlətimizin gücünü və gələcəyə yönəlmiş strateji baxışını aydın şəkildə nümayiş etdirir.
Sonra Naxçıvan Muxtar Respublikası Ali Məclisinin deputatları Nuray Əliyeva, Təhminə Babayeva, Xumar Məmmədova, Asəf Orucov və Əziz Qasımov çıxış edərək Ümummilli Liderin həyat yolunun hər bir azərbaycanlı üçün məsuliyyət, vətənpərvərlik və xalqa xidmət nümunəsi olduğunu qeyd ediblər. Bildirilib ki, Ulu Öndər Heydər Əliyev böyük tarixi şəxsiyyətdir. Məhz onun müdrik siyasəti sayəsində bu gün Azərbaycan müstəqildir, ölkəmizdə sabitlik və milli birlik mövcuddur.

Daha sonra ziyalılar Nazim Bayramov, Urfulla Qurbanov, Nəsir İsmayılov Ulu Öndərlə bağlı öz dəyərli xatirələrini tədbir iştirakçıları ilə bölüşüb, Ulu Öndərin rəhbərliyi ilə ölkəmizdə həyata keçirilən böyük quruculuq işlərindən, müstəqil Azərbaycanın qurulması, inkişafı yolunda göstərdiyi xidmətlərdən bəhs ediblər.
Naxçıvan Şəhər İcra Hakimiyyətinin şöbə müdirinin müavini-sektor müdiri İsmayıl Gülməmmədov, Yeni Azərbaycan Partiyası Naxçıvan Şəhər Təşkilatının sədr müavini Rail Tağızadə, Naxçıvan Dövlət Universitetinin və Naxçıvan Müəllimlər İnstitunun tələbə gənclər təşkilatlarının sədrləri Yusif Mirzəzadə və Altay Cəfərli çıxış edərək bildiriblər ki, Ümummilli Liderin müəyyən etdiyi siyasi xəttin Prezidentimiz cənab İlham Əliyev tərəfindən uğurla davam etdirilməsi nəticəsində vətənimiz Azərbaycan böyük inkişaf və zəfər yolu keçib. 30 ilə yaxın işğal altında olan torpaqlarımız düşmən tapdağından azad olunub və Azərbaycan bu gün regionda lider ölkəyə çevrilib. Vurğulanıb ki, Azərbaycan xalqı qazandığı müstəqilliyə və onun qorunub saxlanması sahəsində əldə etdiyi bütün nailiyyətlərə görə dahi oğluna daim minnətdardır.

Dəyirmi masa mövzu ətrafında fikir mübadiləsi ilə yekunlaşıb.

Sonda muzeyin ekspozisiyasına baxış olub.