Kiyevə kütləvi hava hücumu olub, ölənlər və xəsarət alanlar var - FOTOLAR

Rusiya ordusu sentyabrın 28-nə keçən gecədən başlayaraq Ukraynanın paytaxtı Kiyevə çoxkombinasiyalı hava zərbələri endirib.

NTV-nin verdiyi məlumata görə, ilkin olaraq Kiyevə zərbə dronları, ardınca müxtəlif tipli raketlər və yenidən zərbə dronları ilə hava hücumu edilib. Güclü partlayış səsləri eşidilib və hava hücumundan müdafiə sistemi aktiv işləməyə başlayıb.

7 saata yaxın davam edən hava hücumu zamanı Kiyev şəhərinin mülki, yaşayış infrastrukturuna ciddi ziyan dəyib. Kiyev şəhər Hərbi Administrasiyasının verdiyi məlumata görə, azı 20 yerdə dağıntı qeydə alınıb. O cümlədən, Kardiologiya İnstitutuna, yanacaqdoldurma məntəqəsinə və hündürmərtəbəli binaya ziyan dəyib.

Kiyev şəhər meri Vitali Kliçko bildirib ki, hava hücumu zamanı 4 mülki şəxs həlak olub, 13-ü yaralanıb. Həlak olanlardan biri uşaqdır. Dağıntılar altında insanların qaldığı istisna edilmir.