Pakistanın hakimiyyət orqanları Hindistanda iki yoluxma halı təsdiqləndikdən sonra ölkəyə daxil olan səyahətçilərin ölümcül Nipah virusuna yoluxma əlamətlərinə görə yoxlanılmasının gücləndirilməsi göstərişini verib.
NTV xəbər verir ki, Pakistan Sərhəd Səhiyyə Departamentinin açıqlamasında deyilir: “Pakistan sərhədlərində profilaktik və nəzarət tədbirlərinin gücləndirilməsi vacib hala gəlib”.
“Reuters” agentliyinin məlumatına görə, nazirlik əlavə edib: “Bütün səyahətçilər dəniz limanları, quru sərhədləri və hava limanları giriş nöqtəsində temperatur və sağlamlıq yoxlamasından keçməlidir”.
Nipah virusu qızdırma və beyin iltihabına səbəb ola bilər, həmçinin yüksək ölüm nisbətinə malikdir. Onun vaksini yoxdur. Lakin insandan insana ötürülməsi çətindir və adətən, yoluxmuş şəxslə uzunmüddətli təmas tələb olunur.
Agentlik bildirib ki, səyahət edən şəxslərdən Nipah virusundan təsirlənən bölgələrə və ya yüksək risk olan ölkələrə səfərləri, əvvəlki 21 gün ərzində tranzit səyahətləri barədə məlumat vermələri tələb olunacaq.
ÜST Nipah virusunu prioritet patogen kimi təsnif edir. Hindistanda, xüsusən də Nipah virusunun ötürülmə riskinin ən yüksək olduğu bölgələrdən biri hesab edilən cənubi Kerala ştatında sporadik hallar barədə müntəzəm olaraq bildirilir.
Nipah peyvəndi sınaqlarını maliyyələşdirən Epidemik Hazırlıq İnnovasiyaları Koalisiyasının məlumatına görə, 2025-ci ilin dekabr ayına olan məlumata əsasən, dünyada Nipah virusuna 750 yoluxma halı təsdiqlənib ki, bunlardan 415-i ölümlə nəticələnib.
NTV canlı
Radio canlı
Nuhçıxan