BMT süni intellekt üzrə qlobal dialoqun ilk iclasına hazırlaşır

BMT iyul ayında Cenevrədə illik “Süni intellekt rifah naminə” sammiti çərçivəsində keçiriləcək Süni intellekt üzrə qlobal dialoqun ilk iclasına hazırlıqları davam etdirir.

NTV  BMT-nin məlumatına istinadla xəbər verir ki, təşəbbüsün həmsədrləri müzakirə üçün əsas sahələri müəyyən etmək məqsədilə üzv dövlətlər və maraqlı tərəflərlə məsləhətləşmələr aparırlar.

Dialoq zamanı süni intellektin imkanları və təsirləri, təhlükəsizlik məsələləri, insan hüquqları və rəqəmsal uçurumla bağlı müzakirələrin aparılacağı gözlənilir.

Süni İntellektin İdarə Edilməsi üzrə Qlobal Dialoq BMT-yə üzv dövlətlər tərəfindən ötən ilin avqust ayında müvafiq qətnamənin qəbul edilməsindən sonra yaradılıb. Bu, süni intellektin inkişafı ilə bağlı çətinlikləri və imkanları müzakirə etmək üçün ilk universal beynəlxalq forum olub.

Salvadorun BMT-dəki daimi nümayəndəsi Eqriselda Lopez və Estoniyanın BMT-dəki daimi nümayəndəsi Rein Tammsaar təşəbbüsün həmsədrləri təyin ediliblər.

Onların fikrincə, yeni platforma mövcud beynəlxalq təşəbbüsləri və süni intellekt sahəsində ən yaxşı təcrübələri bir araya gətirməli, mövcud prosesləri təkrarlamaq əvəzinə, onları tamamlamalıdır.

Təhlükəsizlik və insan hüquqları müzakirələrin əsas mövzuları arasında olacaq. Bir çox iştirakçı insan hüquqları üçün ayrıca bir sahənin inkişaf etdirilməsini müdafiə edir.

BMT Baş katibinin rəqəmsal və inkişaf etməkdə olan texnologiyalar üzrə xüsusi elçisi Amandip Qill qeyd edib ki, dialoq bütün bəşəriyyətin rifahı üçün süni intellektdən istifadə etmək üzrə daha geniş strategiyanın bir hissəsidir, həmçinin bilik və təcrübə mübadiləsini sürətləndirəcək.

O, həmçinin Süni İntellekt üzrə Müstəqil Beynəlxalq Elmi Panelin Cenevrədə keçiriləcək iclasında ilk hesabatını təqdim edəcəyini açıqlayıb.

Qillin sözlərinə görə, ölkələrin Davamlı İnkişaf Məqsədlərinə çatmaq və onu effektiv şəkildə tənzimləmək üçün süni intellektdən istifadə etmək imkanları son dərəcə qeyri-bərabər olaraq qalır və bu, rəqəmsal uçurumu azaltmaq üçün səylər tələb edir.

Eqriselda Lopez qlobal dialoqun mandatının süni intellekt tətbiqlərinin hərbi aspektlərinə şamil edilmədiyini bildirib. Təşəbbüsün əsas məqsədi bu sahədə siyasət və tənzimləyici müzakirələr üçün açıq forum yaratmaqdır.