LNG qiymətləri artmağa davam edir

Hörmüz boğazının bağlanması ilə qlobal miqyasda mayeləşdirilmiş təbii qaz (LNG) qiymətləri yüksəlir.

NTV xəbər verir ki, fevralın 28-də Hörmüz boğazının bağlanmasından bəri Avropa və Asiyada təbii qazın qiymətləri ABŞ-dakı qiymətlərdən fərqlənib.

Avropada LNG-nin fyuçers qiymətləri ötən həftənin sonuna milyon Britaniya istilik vahidi (MMBtu) üçün 14,80 dollara yüksəlib ki, bu da Hörmüz boğazının bağlanmasından əvvəlki qiymətlə müqayisədə 35 faiz yüksəkdir. Eyni dövrdə, Şərqi Asiyada qiymətlər 51 faiz artıb. ABŞ-də isə bunun əksinə qiymətlər fevralın 28-dən bəri 9 faiz azalaraq 2024-cü ilin oktyabr ayından bəri ən aşağı səviyyəyə enib. ABŞ mart ayında gündəlik təxminən 17,9 milyard kubfut LNG ixrac edib ki, bu da 2025-ci ilin dekabr ayındakı rekord – sutkalıq 18,4 milyard kubfutdan bəri ikinci ən yüksək aylıq ixrac həcmidir. Martda ABŞ-nin terminalının tutumu ixrac səviyyələrinin 94 faizini təşkil edib.

Gəmiçiliyi izləmə xidməti “Kpler”in məlumatına görə, 1 mart - 24 aprel tarixləri arasında Hörmüz boğazından LNG yüklü heç bir tanker keçməyib. Boğazın bağlanması gündəlik 10 milyard kubfutdan çox LNG-nin azalmasına və ya qlobal tədarükün təxminən 20 faizinə təsir göstərib. Bu da əsasən Qətərin ixracının azalması ilə əlaqədardır. Qətər qazının 80 faizindən çoxunu idxal edən asiyalı alıcılar isə itirilmiş müqavilə həcmlərini əvəz etmək üçün qlobal bazarlara yönəlib.

“Gas Infrastructure Europe”a görə, Avropada qış fəslinin sonlarında təbii qaz anbarlarının doluluq nisbəti 28 faiz təşkil edib ki, bu da 5 illik orta göstərici olan 41 faizdən aşağıdır. Növbəti qış fəslindən əvvəl anbarları doldurmaq üçün daha çox həcm tələb olunacaq. Asiyadakı təbii qaz anbarlarının doluluq nisbəti isə Avropadakından azdır.