Respublika Fənn Olimpiadalarının final mərhələsinə vəsiqə qazanan şagirdlərlə görüş keçirilib - FOTOLAR

Respublika Fənn Olimpiadalarının final mərhələsinə vəsiqə qazanan şagirdlərlə görüş keçirilib.

NTV xəbər verir ki, Naxçıvan Muxtar Respublikasının Təhsil naziri Elxan Nəcəfov Respublika Fənn Olimpiadalarının final mərhələsinə vəsiqə qazanan şagirdlərlə görüşüb. Tədbirdə Təhsil Nazirliyinin əməkdaşları və qalib şagirdlərin müəllimləri iştirak edib. 

Görüşdə məlumat verilib ki, cari tədris ilində Naxçıvan Muxtar Respublikasının ümumtəhsil məktəblərindən olimpiadada iştirak edən şagirdlərdən 32-si final mərhələsinə vəsiqə qazanıb. Diqqətə çatdırılıb ki, ötən illə müqayisədə final turuna vəsiqə qazanan şagirdlərin sayında 88 faiz artım olub.

   Təhsil naziri son illər ölkəmizdə, o cümlədən muxtar respublikada istedadlı şagirdlərin aşkara çıxarılmasına xüsusi diqqət yetirildiyini, onların bilik və bacarıqlarının inkişaf etdirilməsi istiqamətində ardıcıl və məqsədyönlü işlərin görüldüyünü bildirib. Qeyd olunub ki, aprelin 10-da Naxçıvan Muxtar Respublikası Təhsil Nazirliyi ilə bp arasında imzalanan əməkdaşlıq sazişi də istedadlı şagirdlərin aşkarlanması, onların yerli və beynəlxalq olimpiadalara hazırlığının dəstəklənməsində mühüm rol oynayacaq. Şagirdlərin olimpiadaya hazırlıq vəziyyəti ilə də maraqlanan Elxan Nəcəfov iştirakçılara final mərhələsində uğurlar arzulayıb. 

Finala vəsiqə qazanan məktəblilər, onların müəllimləri olimpiada və müsabiqələrin əhəmiyyətindən danışıb, onları maraqlandıran suallar cavablandırılıb.