İran və Rusiya XİN başçıları Tehranda Cənubi Qafqazdakı vəziyyəti müzakirə edəcəklər

Rusiyanın xarici işlər naziri (XİN) Sergey Lavrov iranlı həmkarı Abbas Əraqçinin dəvəti ilə bu gün Tehrana işgüzar səfərə gedəcək.

Naxçıvan televiziyası Rusiya Xarici İşlər Nazirliyinə istinadən xəbər verir ki, tərəflər Rusiya-İran münasibətlərinin ikitərəfli gündəliyini müzakirə edəcəklər.

Danışıqların əsas məsələsi ticari-iqtisadi əməkdaşlığın genişləndirilməsi, o cümlədən enerji və nəqliyyat sahələrində birgə layihələrin həyata keçirilməsi olacaq.

"Həmçinin Cənubi Qafqaz, Əfqanıstan, Yəmən, Fars körfəzindəki vəziyyət, Yaxın Şərq nizamlanması, Xəzər problemi və İranın nüvə proqramı üzrə Birgə Hərtərəfli Fəaliyyət Planının perspektivləri kimi aktual beynəlxalq məsələlər ətrafında fikir mübadiləsi gözlənilir", - XİN-dən bildirilib.