Xəzər dənizinin səviyyəsinin düşməsi regionda ekoloji təhlükə yaradır

Xəzər dənizinin dayazlaşması regionda yeni toz və duz çirklənməsi mənbələrinin formalaşmasına səbəb ola bilər.

NTV xəbər verir ki, bu barədə Azərbaycan Milli Elmlər Akademiyasının (AMEA) baş elmi işçisi Elnur Səfərov Bakıda WUF13 çərçivəsində keçirilən "Dayanıqlı şəhərlər üçün təmiz hava və yaşıl infrastruktur" mövzusunda tədbirdə çıxış edərkən bildirib.

Onun sözlərinə görə, istiləşmə və buxarlanmanın güclənməsi şəraitində Xəzərin şimal hissəsi şoranlıq və tozlu zonaya çevrilə bilər.

"Bir neçə onillikdən sonra Xəzər dənizinin şimal hissəsi şoranlıq və tozlu məkana çevrilə bilər", - o bildirib.

E. Səfərov qeyd edib ki, bu, əhalinin sağlamlığı və kənd təsərrüfatı üçün əlavə risklər yaradacaq.