Avropada isti hava dalğaları məktəblər üçün problemlər yaradıb

Avropada minlərlə məktəb qitəni bürüyən ölümcül, rekord həddə çatan isti hava dalğası zamanı şagirdlərini evə göndərmək məcburiyyətində qalıb.

NTV xəbər verir ki, bu cür hadisələr daha tez-tez baş verdikcə və şiddətləndikcə, bir çox məktəb uşaqları istidən lazımi səviyyədə qoruya bilmir.

“Reuters” agentliyinin məlumatına görə, Böyük Britaniyada təxminən 1000 məktəb bağlanıb və ya onlarda dərs gününü qısaldıb. Hakimiyyət orqanları valideynlərin uşaqlarını evdə saxlaması səbəbindən qalan açıq məktəblərdə davamiyyətin azaldığını bildirib.

Fransanın təhsil naziri Eduard Jöffrey cümə axşamı isti hava səbəbindən 13500 məktəbin bağlandığını və ya xüsusi dərs cədvəlinə keçdiyini bildirib.

Avropada nisbətən az sayda məktəb kondisionerlə təchiz olunub.

Britaniya müəllimlər həmkarlar ittifaqı NASUWT bildirib ki, çərşənbə axşamı bəzi sinif otaqlarında, xüsusən də günəş altında olanlarda temperatur 40 dərəcə Selsiyə yüksəlib və bir neçə şagird dərsdə huşunu itirib.

Tədqiqatçılar sinif otaqlarında yüksək temperaturun təhsilə birbaşa təsir etdiyini aşkar ediblər. 2019-cu ildə "Building and Environment" jurnalında dərc olunmuş bir araşdırmada sinif otaqlarının temperaturunun 30°C-dən 20°C-yə endirilməsinin akademik göstəriciləri 20 faiz artırdığı qənaətinə gəlinib.

Ənənəvi olaraq, Cənubi Avropa yay istiləri ilə mübarizə aparmaqda daha çox təcrübəyə malikdir. İspaniyadakı əksər məktəblər günorta istisindən qorunmaq üçün iyun və sentyabr aylarında qısaldılmış dərs gününə keçir. İspaniya, Yunanıstan və İtaliyada məktəb tətilləri də Şimali Avropa ölkələrindəki məktəblərdən daha tez, iyunun ortalarında başlayır.

İspaniya məktəblərində “Greenpeace” tərəfindən quraşdırılmış istilik görüntüləmə kameraları Madriddə sinif otaqlarında 35°C-yə qədər, Sevilyada isə məktəb həyətlərində 60°C-yə qədər səth temperaturu qeydə alıb. Barselonada şəhər meriyası 2030-cu ilə qədər təxminən 170 məktəb və təhsil mərkəzini kondisionerlə təchiz etmək üçün turist vergisindən 100 milyon avro toplayıb.

Fransada iqlim dəyişikliyinə uyğunlaşma üçün ayrılan 800 milyon avroluq büdcənin bir hissəsi olaraq, məktəblərdə 6200 istilik azaldılması layihəsi həyata keçirilir.