Portuqaliya supervarlıların əsas yaşayış və investisiya mərkəzlərindən birinə çevrilir

Portuqaliya son beş ildə ultra zəngin sakinlərin sayının nəzərəçarpacaq dərəcədə artdığı Avropa ölkələrindən birinə çevrilib.

NTV xəbər verir ki, Böyük Britaniyanın “Knight Frank” şirkətinin araşdırmasına əsasən, sərvəti 25 milyon avrodan çox olan şəxslərin sayı ölkədə təxminən 50 faiz artaraq 2026-cı ildə 2187 nəfərə çatıb.

Ekspertlərin fikrincə, yüksək həyat keyfiyyəti, təhlükəsizlik, əlverişli iqlim və inkişaf etmiş lüks daşınmaz əmlak bazarı Portuqaliyanın cəlbediciliyini artıran əsas amillərdir. Xarici investorlar xüsusilə Lissabon, Kaşkayş, Komporta və Alqarvedə bahalı yaşayış obyektlərinə maraq göstərirlər. Bununla yanaşı, ölkədə formalaşan yeni varlı təbəqənin əhəmiyyətli hissəsini bizneslərini uğurla satan yerli sahibkarlar təşkil edir. Mütəxəssislər hesab edirlər ki, bəzi vergi güzəştlərinin ləğvinə baxmayaraq, Portuqaliya yaxın illərdə də varlı investorlar üçün ən cəlbedici istiqamətlərdən biri olaraq qalacaq.