Yapon yeninin məzənnəsi 40 ilin minimum həddinə düşüb

İyunun 30-da yapon yeninin dollara nisbətdə məzənnəsi 1986-cı ildən bəri görünməyən həddə qədər ucuzlaşıb.

NTV  xəbər verir ki, çərşənbə axşamı yen 40 ildə ilk dəfə olaraq zəifləyərək bir dollar üçün 162,41-ə düşüb, sonuncu dəfə isə 162,23 səviyyəsində ticarət olunub. Yaponiyanın maliyyə naziri Satsuki Katayama hökumətin istənilən vaxt müvafiq tədbirlər görməyə hazır olduğunu bir daha vurğulayıb və daha sərt ritorikadan çəkinib.

“Reuters” agentliyinin məlumatına görə, geniş faiz dərəcəsi fərqi yenə təzyiq göstərdiyindən, Yaponiya valyutasının ikinci rübdə 2 faiz ucuzlaşması gözlənilirdi ki, bu da ardıcıl dördüncü rübdə eniş və son dörd ildə ən uzun belə seriyadır.

“Söhbət Maliyyə Nazirliyinin yenə dəstək olmaq üçün yenidən müdaxiləsindən deyil, bunu nə vaxt edəcəyindən gedir”, - deyə Avstraliyanın “Commonwealth” Bankının valyuta strateqi Kerol Konq bildirib.

O əlavə edib: “Lakin hər hansı bir müdaxilənin USD/JPY nisbətində ümumi yüksəliş trendini dəyişdirməsi ehtimalı azdır”. Ekspert yapon valyutasının 2027-ci ilin əvvəlinə qədər ABŞ dollarına nisbətdə 164 yenə çatacağını gözləyir.

Yapon yeni son aylarda Yaponiya Bankının 72,25 milyard dollarlıq müdaxilələrinə və faiz dərəcələrinin artırılmasına uğurla müqavimət göstərib, çünki İranla müharibə inflyasiya qorxularını artırıb, həmçinin qlobal faiz dərəcəsi proqnozunu sarsıdıb. Aprelin sonu və may ayının əvvəlindəki müdaxilələr yeni qısa müddətə möhkəmləndirsə də, treyderlər bu ilin sonlarında ABŞ Federal Ehtiyat Sisteminin faiz dərəcəsinin artırılması ilə bağlı qiymət təklif etməyə başlayacağı fonunda yapon valyutasının yenidən təzyiq altında qalacağını bildirirlər. Onlar sentyabr ayına qədər faiz dərəcəsinin artırılması ehtimalını 61 faiz səviyyəsində qiymətləndirirlər.