Naxçıvan Şəhər Təhsil Şöbəsinin təşkilatçılığı ilə “Tədris motivasiyası və öyrənməyə marağın artırılması” mövzusunda valideyn konfransı keçirilib - FOTOLAR

NTV xəbər verir ki, Yanvarın 15-də Naxçıvan Şəhər Təhsil Şöbəsinin təşkilatçılığı ilə Naxçıvan Dövlət Texniki Kollecində “Tədris motivasiyası və öyrənməyə marağın artırılması” mövzusunda valideyn konfransı keçirilib.

Konfransda Naxçıvan Şəhər Təhsil Şöbəsinin əməkdaşları, Naxçıvan Dövlət Universitetinin Magistatura və doktorantura mərkəzinin direktoru, psixologiya üzrə fəlsəfə doktoru Çapay Quliyev, valideyn qismində Ağsaqqallar Şurasının sədri Məmməd Məmmədov, təhsil müəssisələrinin rəhbərləri, psixoloqlar, məktəblərin valideyn komitəsinin sədrləri və valideynlər iştirak edib.

 İlk olaraq, Azərbaycan Respublikasının Ümummilli Lideri Heydər Əliyevin və Vətənimizin azadlığı uğrunda canından keçmiş şəhidlərimizin əziz xatirəsi bir dəqiqəlik sükutla yad olunub. Dövlət Himninin səsləndirilməsi ilə konfrans açıq elan edilib.

Konfransı giriş sözü ilə Naxçıvan Şəhər Təhsil Şöbəsinin müdiri Təhminə Mustafayeva açaraq konfransın keçirilməsinin əsas məqsədinin təhsil müəssisələri ilə ailə arasında əməkdaşlığı gücləndirməklə yanaşı uşaqların hərtərəfli inkişafını təmin etmək, valideynin və uşağın akademik eyni zamanda sosial və emosianal inkişafında rolunu inkişaf etdirmək, təhsil müəssisələrində sosial, psixoloji mühitin yaxşılaşdırılması, uşaqların hərtərəfli inkişafını təmin etmək, valideynlərin təhsil prosesinə sistemli şəkildə cəlb olunması, uşaqlarımızın sağlam mənəvi mühitdə formalaşması üçün valideyn məsuliyyətini ön plana çıxarmaq və təlim-tərbiyə prosesində birgə fəaliyyət imkanlarını genişləndirməkdən ibarət olduğunu iştirakçıların diqqətinə çatdırıb.

Valideyn qismində iştirak edən Ağsaqqallar Şurasının sədri Məmməd Məmmədov çıxış edərək məktəb–ailə tərəfdaşlığını möhkəmləndirmək üçün özünün illərlə topladığı həyat təcrübəsi, cəmiyyətimizə verdiyi töhfələr və gənc nəsillərə göstərdiyi yolgöstərici mövqeyi haqqında iştirakçılara məlumat verib.

Konfrans iki hissədən ibarət olaraq keçirilib. Birinci hissədə mövzu ilə bağlı panel müzakirəsi təşkil olunub, ikinci hissədə isə valideynlər tərəfindən ünvanlanan suallar cavablandırılıb.

Panel müzakirədə konfransın moderatoru – Naxçıvan Şəhər Təhsil Şöbəsinin aparıcı məsləhətçisi Həmidə Qoçəliyeva, spikerlər – Naxçıvan Dövlət Universitetinin Magistatura və doktorantura mərkəzinin direktoru, psixologiya üzrə fəlsəfə doktoru Çapay Quliyev, Naxçıvan şəhər 16 nömrəli tam orta məktəbin direktoru Abdulla Əsgərov, Naxçıvan şəhər 11 nömrəli tam orta məktəbin Azərbaycan dili və ədəbiyyat müəllimi Dürdanə Quliyeva “Tədris motivasiyası və öyrənməyə marağın artırılması”na dair mövzuya üç yanaşma ilə – məktəb rəhbərliyi, müəllim və məktəb psixoloqu baxış bucağından aydınlıq gətiriblər. 

Mövzu ətrafında spikerlər tərəfindən müzakirələr aparılıb, iştirakçıların fikir və təklifləri dinlənilib. Valideynlərin fəal iştirakı konfransın səmərəli keçməsinə şərait yaradıb. Eyni zamanda valideyinlərələ mövzu ətrafinda sorğu keçirilib. 

Konfransın sonunda müzakirələrin nəticələri ümumiləşdirilib və iştirakçılara təşəkkür edilib.

Qeyd edək ki, valideyn konfransı bölmə iclasları şəklində Naxçıvan Şəhər Təhsil Şöbəsinin tabeliyində fəaliyyət göstərən ümumi təhsil müəssisələrində keçiriləcəkdir.