ABŞ hərbçiləri üçün biraylıq komendant saatı tətbiq olunacaq

Yaponiyanın cənubundakı Okinava prefekturasındakı ABŞ hərbi bazasının şəxsi heyətinə 48 saatlıq əməliyyat fasiləsi və bir ay davam edəcək komendant saatı tətbiq etmək barədə əmr verilib.

NTV Yaponiya mediasına istinadla xəbər verir ki, qərar ABŞ dəniz piyadasının yerli sakini qətlə yetirmək və soyğunçuluq etmək şübhəsi ilə həbs edilməsindən sonra verilib. İddiaya görə, ABŞ dəniz piyadaları korpusunun hərbçisi Devin Ceykob Ballard oktyabrın 3-də Naha şəhərindəki bir hoteldə 39 yaşlı yerli qadını öldürüb, onun cüzdanını və digər əşyalarını götürüb. Amerikalı hərbçi hadisənin ertəsi günü saxlanılıb, hazırda istintaq aparılır.

Okinava bölgəsi üzrə koordinator və 3-cü dəniz piyadaları ekspedisiya qüvvələrinin komandanı general-leytenant Benjamin Uotson oktyabrın 6-da axşamı gecə saatlarında "Standartlar və İntizam" başlıqlı bir bildiriş yayımlayıb və onu sosial şəbəkələrdə paylaşıb. O, Okinavadakı bütün ABŞ hərbi qulluqçularına oktyabrın 7-dən günorta saatlarından etibarən 48 saat müddətində bölmələrin fəaliyyətini dayandırmaq barədə göstəriş verib. Bu müddət ərzində bazadan kənarda sərbəst hərəkət qadağan edilib. Bundan əlavə, hərbi qulluqçulardan oktyabrın 9-dan başlayaraq 30 gün müddətində gecə yarısından səhər saat 05:00-a qədər evdə qalmaları tələb olunacaq.

Okinava prefekturasının qubernatoru Koca Genta general-leytenant Benjamin Uotsonu və digər rəsmiləri ofisinə çağıraraq hadisə ilə bağlı narazılığını bildirib və ABŞ qüvvələrindən ciddi, təsirli tədbirlər görməyi tələb edib.

Qeyd edək ki, Yaponiya Baş naziri Sanae Takaiçi də baş verən hadisə ilə əlaqədar ölkəsinin sərt etirazını bildirib və Birləşmiş Ştatları istintaqla tam əməkdaşlıq etməyə, həmçinin şəxsi heyət arasında ciddi intizam tədbirləri görməyə çağırıb. O, hadisəni son dərəcə təəssüf doğuran və dəhşətli cinayət adlandırıb. Hadisənin yaratdığı hiddət fonunda Tokio müxtəlif səviyyələrdə ABŞ-yə etirazını bildirib. Amerikalı hərbçilərin iştirakı ilə törədilən əvvəlki cinayətlər Yaponiyadakı ABŞ hərbi obyektlərinin əksəriyyətinə ev sahibliyi edən Okinava sakinlərində də hiddət doğurub. İllər ərzində prefekturada ABŞ hərbçilərinin iştirakı ilə qadınlara qarşı çoxsaylı cinayətlər qeydə alınıb.