Almaniyanın əmək və sosial məsələlər naziri, Sosial Demokrat Partiyasının (SPD) həmsədri xanım Berbel Bas hər iki vəzifəsindən istefa verdiyini açıqlayıb.
NTV xəbər verir ki, B.Bas qərarını ögey qızının vəfatından sonra vaxta ehtiyac duyması və üzləşdiyi ictimai tənqidlərlə əsaslandırıb. O, şəxsi səbəblərdən hökumət və partiya fəaliyyətini tam həcmdə davam etdirmək üçün hazırda kifayət qədər gücə malik olmadığını bildirib. Siyasətçi SPD-nin həmsədri vəzifəsini oktyabrın 12-də tərk etdiyini, Kansler Fridrix Mertsdən isə onu nazir vəzifəsindən azad etməsini xahiş etdiyini deyib.
B.Bas son günlər, o cümlədən hakim koalisiyanın tərəfdaşı olan Xristian Demokrat Birliyinin (CDU) nümayəndələrinin onun ünvanına yönələn tənqidlərini də xatırladıb. CDU-dan olan bəzi siyasətçilər onu pensiya islahatları ilə bağlı qanun layihələrinin hazırlanmasını ləngitməkdə ittiham ediblər.
Buna baxmayaraq, B.Bas Bundestaq deputatı kimi fəaliyyətini davam etdirəcəyini bildirib.
B.Basın istefası Almaniyada hakim koalisiya daxilində pensiya və sosial təminat islahatları ətrafında fikir ayrılıqlarının yaşandığı bir vaxta təsadüf edir. Son həftələrdə SPD ilə Xristian Demokrat İttifaqı/Xristian Sosialist İttifaqı (CDU/CSU) arasında bu islahatların həyata keçirilməsi ilə bağlı fikir ayrılıqları diqqət çəkir.
NTV canlı
Radio canlı
Nuhçıxan