Naxçıvanda şagird sayı 151-500-dək olan ümumtəhsil müəssisələrinə vakant direktor vəzifəsi üçün müsahibə mərhələsi təşkil olunub - FOTOLAR

NUHÇIXAN xəbər verir ki, noyabrın 16-da Naxçıvan Muxtar Respublikası Təhsil Nazirliyi tərəfindən "Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı"nın müvafiq bəndinə uyğun olaraq

Nazirliyə tabe şagird sayı 151-500-dək olan ümumtəhsil müəssisələrinə vakant direktor vəzifəsi üçün müsabiqənin müsahibə mərhələsi təşkil olunub.

Müsahibə mərhələsində 6 oktyabr 2024-cü il tarixində Naxçıvanda ilk dəfə olaraq ölkə üzrə mərkəzləşmiş qaydada şagird sayı 151-500-dək olan ümumtəhsil müəssisələrinə direktor vəzifəsi üçün keçirilən test imtahanında uğur qazanan 12 namizəddən 10-u iştirak edib.  

Müsahibə video-çəkiliş təmin edilməklə namizədlərin vəzifə üzrə nəzəri bilikləri, idarəetmə bacarıqları və liderlik keyfiyyətləri ümumi 5 ballıq şkala əsasında qiymətləndirilib. Qeyd edək ki, 3 və daha çox bal toplamış namizədlərdən ən yüksək nəticə göstərən namizəd vəzifəyə təyin olunacaq. Keçid balını toplamış və vəzifəyə təyin olunmayan namizədlər isə ehtiyat kadrlar siyahısına daxil ediləcək. 

Məlumat üçün bildirək ki, müsabiqəyə 4 direktor vəzifəsi çıxarılıb.

Müsabiqənin müsahibə mərhələsinin nəticələri haqqında məlumat yaxın günlərdə Nazirliyin sosial şəbəkə hesablarında yerləşdiriləcək.