Naxçıvanda stolüstü tennis birinciliyi keçirilib - FOTOLAR

Naxçıvan televiziyası xəbər verir ki, aprelin 9-da Naxçıvan şəhərində “Konstitusiya və Suverenlik İli” nə həsr ounmuş stolüstü tennis birinciliyi təşkil olunub. Milli Müdafiə Universitetinin tabeliyində fəaliyyət göstərən Naxçıvan Hərbi Kollecində reallaşan yarış ali və orta ixtisas təhsili müəssisələrinin tələbələrini və hərbi liseyin kursantlarını əhatə etməklə, oğlanlar və qızlar arasında keçirilib. 

Nəticələrə əsasən Naxçıvan Dövlət Universitetinin (NDU) tələbələri Lalə Musayeva və Zabihi İlyas yarışın qalibi olublar. Rübab Əliyeva (Naxçıvan Müəllimlər İnstitutu) və Elsən Quliyev (NDU) ikinci, Obut Beyza (NDU) ilə Uğur Həsənov (Naxçıvan Hərbi Kolleci) isə üçüncü yerə sahib çıxıblar.

Naxçıvan Muxtar Respublikası Gənclər və İdman Nazirliyinin, Naxçıvan Hərbi Kollecinin dəstəyi, Naxçıvan Şəhər Gənclər və İdman İdarəsi və Naxçıvan Şəhər Uşaq-Gənclər İdman Məktəbinin təşkilatçılığı ilə keçirilən yarışın sonunda ilk üç yerin sahiblərinə diplom və medallar, hakimlərə isə təşəkkürnamə təqdim edilib.