Zelenski: Tərəfdaşlarla birlikdə əsas məqsəd gələn il müharibəyə son qoymaqdır

Ukrayna Prezidenti Volodimir Zelenski NATO baş katibi Mark Rutte ilə müharibənin gələn il başa çatması perspektivini müzakirə edib.

NUHÇIXAN xəbər verir ki, bu barədə V.Zelenski “X”də yazıb.

Telefon danışığı zamanı o, Trampın qətiyyətini yüksək qiymətləndirdiyini bildirib: “Davamlı və etibarlı sülhü təmin etmək üçün indi mümkün qədər çox detalı tərəfdaşlarımızla bölüşmək istəyirik”.

O, həmçinin qeyd edib ki, indi Avropanın hamının xeyrinə olacaq aydın və vahid mövqeyə ehtiyacı var: “Hər səviyyədə biz indi qərarlarımızı daha effektiv edə biləcəyimizi müzakirə edirik. İşə cəlb olunmuş liderlərdən ibarət komandaların daha da intensiv işləməsi vacibdir. Mən ədalətli sülh üçün hansı təminatların lazım olduğunu müəyyən etmək üçün tez-tez görüşlərin keçirilməsinin zəruriliyini vurğuladım. Biz bu ilin dekabrında keçiriləcək görüşlər və danışıqlar ərəfəsində mövqelərimizi əlaqələndiririk. Bizim ortaq məqsədimiz gələn il, ən qısa zamanda müharibəyə ədalətli şəkildə son qoymaqdır”.

V.Zelenski həmçinin qeyd edib ki, müharibəni Rusiyadan başqa kimsə istəmir: “Sülh bizim ümumi uğurumuz olmalıdır - Ukraynanın, Amerikanın, Avropanın və bütün tərəfdaşlarımızın”.