İranda sosial şəbəkələrə qoyulan məhdudiyyətlər aradan qaldırıla bilər

İranda sosial şəbəkələr və populyar messencerlərə tətbiq olunan məhdudiyyətlərin aradan qaldırılması məsələsi müzakirə edilir.

NTV  xəbər verir ki, İran parlamenti sədrinin müavini Əlirza Səlimi bu barədə Asiya Parlament Assambleyasının iclası çərçivəsində jurnalistlərə açıqlamasında deyib. Onun sözlərinə görə, sosial şəbəkələrə qoyulan məhdudiyyətlər təhlükəsizlik və informasiya təzyiqi ilə bağlı olub. Lakin bu məsələ təkcə parlamentin deyil, həm də müvafiq sahəyə cavabdeh olan Ali Kiberməkan Şurasının səlahiyyətindədir və hazırda həmin şura məhdudiyyətlərin aradan qaldırılması imkanlarını nəzərdən keçirir.

Bir müddət öncə, İran mediası “Telegram”, “YouTube” və “Instagram” kimi platformalara qoyulan məhdudiyyətlərin yumşaldılması ehtimalı barədə məlumat yaymışdı.

Xatırladaq ki, Tehran “Telegram” messencerini 2018-ci ildə, “Facebook” və “Twitter” şəbəkələrini 2009-cu ildə, “Instagram” və “WhatsApp” messencerlərini isə 2022-ci ildə məhdudlaşdırmışdı.