İran və ABŞ memorandum imzaladıqdan sonra danışıqlar üçün 2 ay vaxt ayıracaqlar

Anlaşma memorandumu imzalandıqdan sonra Tehran və Vaşinqton qalan mübahisəli məsələlər üzrə 2 ay ərzində danışıqlar aparacaqlar.

NTV-nin Press TV-yə istinadla verdiyi xəbərə görə, bu barədə İran xarici işlər nazirinin müavini Kazem Qəribabadi bildirib. O deyib: “Rəsmi imzalanma cümə günü baş tutacaq və iki nümayəndə heyətinin rəhbərləri gələcək danışıqların addımlarını müəyyən etmək üçün görüşəcəklər. Həmin vaxta qədər Amerika tərəfinin müharibəyə son qoymaq, blokadanı aradan qaldırmaq və aktivləri azad etmək öhdəliyi sınaqdan keçiriləcək”.

İran xarici işlər nazirinin müavini vurğulayıb ki, danışıqlar yalnız ABŞ-nin müqavilə üzrə öhdəliklərini yerinə yetirməsi halında başlayacaq.

İranlı diplomat, həmçinin qeyd edib ki, memoranduma dair mətn imzalandıqdan sonra dərc olunacaq.