Fransanın büdcə vəziyyəti ilə bağlı xəbərdarlıq edilib

Fransanın İFRAP fondunun direktoru, iqtisadçı Aqnes Verdye-Moliniye ölkənin ağırlaşan büdcə vəziyyəti ilə bağlı xəbərdarlıq edib. Onun fikrincə, 2027-ci il prezident seçkisi kampaniyasının əsas mövzusu dövlət maliyyəsinin balanslaşdırılması olmalıdır. İqtisadçı Fransanın artıq “Avropanın xəstəsi”nə çevrildiyini bildirib.

NTV   xəbər verir ki, Verdye-Moliniyenin sözlərinə görə, Fransa hökuməti gələn il dövlət borcuna xidmət xərclərinin 91 milyard avro olacağını proqnozlaşdırır. Lakin ölkənin borclanma faizlərinin hazırda təxminən 5 faiz səviyyəsində olması bu məbləğin 2027-ci ildə 100 milyard avroya yaxınlaşmasına səbəb ola bilər.

İqtisadçı vəziyyətin siyasi dairələri ciddi tədbirlər görməyə sövq etməli olduğunu vurğulayıb. O, dövlət xərclərinin gəlirlərlə uyğunlaşdırılmasını və borc üzrə faiz ödənişləri nəzərə alınmadan büdcənin ilkin balansının təmin edilməsini vacib sayır. Bununla belə, onun fikrincə, konstitusion “qızıl qayda”nın tətbiqi problemi həll etməyəcək.

2027-ci il prezident seçkisinə hazırlaşan bir sıra siyasətçilər dövlət maliyyəsinin balanslaşdırılmasına nail olacaqlarını vəd ediblər. Bruno Retayo və Marin Lö Pen ilkin büdcə balansının təmin edilməsini hədəfləyirlər. Qabriel Attal isə 2037-ci ilədək dövlət maliyyəsində tam tarazlıq yaratmağı vəd edir. Eduar Filip 2032-ci ilədək büdcə kəsirinin 2 faizə endirilməsini, David Lisnar isə cari xərclər üzrə balansın təmin olunmasını müdafiə edir.

Verdye-Moliniye solçu namizədlərin isə ilkin büdcə balansı və ya kəsirin 3 faizə endirilməsi ilə bağlı konkret öhdəlik götürmədiyini bildirib.

İqtisadçı hesab edir ki, Fransa digər Avropa ölkələrinin təcrübəsindən yararlana bilər. Onun sözlərinə görə, Portuqaliya borcunu azaldıb və iqtisadi artımını təxminən 2 faiz səviyyəsində saxlayıb. Yunanıstan və İtaliya da borclarının azalmasına və ya sabitləşməsinə nail olub.

Verdye-Moliniyenin fikrincə, bu nümunələr Fransanın dövlət maliyyəsini sağlamlaşdırmasının mümkün olduğunu göstərir və məsələ 2027-ci il prezident seçkisinin əsas gündəminə çevrilməlidir.