Yeddi Avropa ölkəsinin həmkarlar ittifaqları və mənzil hüquqlarını müdafiə edən təşkilatlar noyabrın 20-dən etibarən 3 gün ərzində bahalığa qarşı Avropa miqyasında əlaqələndirilmiş etiraz aksiyaları keçirməyə çağırıblar.
NTV xəbər verir ki, noyabrın 3-də Parisdə keçirilən görüşdə İspaniya, Fransa, İtaliya, Böyük Britaniya, Portuqaliya, Yunanıstan və Belçikadan olan təşkilatların nümayəndələri aksiyalarda milyonlarla insanın iştirak edəcəyinə ümid etdiklərini bildiriblər.
Təşkilatların əsas tələbləri mənzil hüququnun təmin edilməsi, mənzil, ərzaq və enerji qiymətlərinə nəzarətin gücləndirilməsi, əməkhaqqı və pensiyaların artırılmasıdır. Onlar. həmçinin təhsil, səhiyyə və dövlət mənzil xidmətlərinin qorunmasını, miqrantların əmək hüquqlarının təmin edilməsini, varlıların daha çox vergiyə cəlb olunmasını və yenidən silahlanma siyasətinə, eləcə də fosil yanacaqların inkişafına son qoyulmasını tələb edirlər.
Görüşün təşəbbüskarlarından olan İspaniya Kirayəçilər Həmkarlar İttifaqları Konfederasiyasının nümayəndəsi Karm Arakazo Avropada alıcılıq qabiliyyəti böhranının dərinləşdiyi bir vaxtda təşkilatların birgə fəaliyyət göstərmək qərarına gəldiklərini bildirib.
İspaniyada əsas həmkarlar ittifaqları mənzil və əməkhaqqı tələbləri ilə noyabrın 11-də ümumi tətilə çağırıblar. Fransa CGT və Solidaires həmkarlar ittifaqları, eləcə də Mənzil Hüququ Assosiasiyası (DAL) da Avropa miqyaslı etiraz çağırışına qoşulub.
NTV canlı
Radio canlı
Nuhçıxan