Naxçıvan Muxtar Respublikası Gənclər və İdman Nazirliyinin mətbuat xidmətndən NTV-yə verilən məlumata görə, Naxçıvan şəhərində ümummilli Lider Heydər Əliyevin anadan olmasının 103-cü ildönümü münasibətilə Naxçıvan Muxtar Respublikasında fəaliyyət göstərən ümumtəhsil məktəblərinin şagirdləri arasında keçirilən “Gənc İstedadların Dram Dünyası” adlı teatr müsabiqəsinin final mərhələsi təşkil olunub. Heydər Əliyev Uşaq-Gənclər Yaradıcılıq Mərkəzində reallaşan müsabiqə finalında 11 komanda iştirak edib.
Komandalar müxtəlif mövzularda hazırladıqları teatr tamaşaları və səhnəciklərlə çıxış edərək yaradıcılıq imkanlarını nümayiş etdiriblər. Çıxışlar münsiflər heyəti tərəfindən qiymətləndirilib. Münsiflərin ümumi qərarına əsasən Naxçıvan şəhər komandası birinci yerə layiq görülüb. Şahbuz və Ordubad komandaları müvafiq olaraq ikinci, üçüncü yerlərə sahib çıxıblar.
Naxçıvan Muxtar Respublikasınən Gənclər və İdman, Təhsil, Mədəniyyət nazirliklərinin birgə təşkilatçılığı ilə keçirilən müsabiqənin əsas məqsədi məktəblilərin teatr sənətinə marağının artırılması, onların yaradıcılıq qabiliyyətlərinin üzə çıxarılması, vətənpərvərlik ruhunda tərbiyəsinə töhfə verilməsi, milli-mənəvi dəyərlərə bağlılığının gücləndirilməsi, eləcə də nitq mədəniyyəti, səhnə davranışı və ünsiyyət bacarıqlarının inkişafına dəstək olmaqdan ibarətdir.
Qeyd edək ki, müsabiqənin mükafatlabdırma mərasimi iyunun 8-i saat 15:00-da eyni məkanda keçiriləcək.
NTV canlı
Radio canlı
Nuhçıxan