Naxçıvanda gənclər şəhid ailələrini ziyarət edib - FOTOLAR

NUHÇIXAN xəbər verir ki, Naxçıvanda bir qrup könüllü gənc Şərur rayonunda yaşayan şəhid ailələrini ziyarət edib.

Naxçıvan Muxtar Respublikasının Gənclər və İdman Nazirliyi, Gənclər Fondu, Azərbaycan Vətən Müharibəsi Veteranları və Şəhid Ailələri Naxçıvan Muxtar Respublika Təşkilatının birgə təşkilatçılığı ilə təşkil olunan tədbirin iştirakçıları şəhidlərimiz – İlkin Muradlı, Elşən Orucov, İman Alməmmədov və Cavid Bayramlının ailə üzvləri ilə görüşüb, qəhrəmanlarımızın həyatı, döyüş yolu və şücaəti barədə məlumat alıblar.

Gənclər və idman nazirinin müavini, Azərbaycan Vətən Müharibəsi Veteranları və Şəhid Ailələri Naxçıvan Muxtar Respublika Təşkilatının sədri Məcid Seyidov və Gənclər Fondunun icraçı direktoru Cəbi Quliyev görüşlər zamanı şücaətli, cəsur, eyni zamanda vətənpərvər övlad yetişdirdikləri üçün şəhid valideynlərinə minnətdarlıqlarını ifadə ediblər.

İştirakçılara qəhrəman şəhidlərimizin şərəfli döyüş yolu, təltif edildikləri orden və medallar barədə məlumat verilib. Gənclər şəhidlərimizə aid xatirə guşələri ilə də tanış olublar.

                                                      Məmməd Qurbanlı