ABŞ-ın Filadelfiya şəhər meriyasının “City Hall”dakı binasının qarşısında 28 May – Müstəqillik Günü münasibətilə Azərbaycan Bayrağının qaldırılması mərasimi keçirilib.
Diasporla İş üzrə Dövlət Komitəsindən Naxçıvan televiziyası-a bildirilib ki, Filadelfiyada fəaliyyət göstərən Azərbaycan icmasının rəhbəri Şirazi Abdullayevin təşəbbüsü ilə baş tutan mərasimdə meriyanın nümayəndəsi Şeyla Hess, şəhər şurasının üzvü Devid Oh, Azərbaycanın ABŞ-dakı səfirliyinin konsulu Ceyhun Novruzov, Türk-Amerika Milli İdarəetmə Komitəsinin (TASC) türk dövlətləri üzrə təmsilçisi Muhammed Sami Görgülü, Amerika Ahıska Türkləri Fondunun rəhbəri Şuhrat Temirov və digər qonaqlar iştirak ediblər.
Tədbirdə çıxış edən amerikalı musiqiçi, Amerika Muğam Cəmiyyətinin sədri Cefri Verbax və digərləri şəhərin ictimai-siyasi, sosial-iqtisadi sahələrinə, mədəni müxtəlifliyinə və millətlərarası qarşılıqlı anlaşmaya töhfələr verən soydaşlarımızı bayram münasibətilə təbrik ediblər. Məhz Filadelfiyada 1776-cı ildə ABŞ-ın Müstəqillik Bəyannaməsinin imzalandığını xatırladan natiqlər Amerika azərbaycanlılarının öz ölkələrinin Müstəqillik Gününü bu şəhərdə qeyd etməsinin rəmzi məna daşıdığını vurğulayıblar.
Azərbaycan Bayrağının Dövlət Himnimizin sədaları altında ucaldılmasından sonra şəhər meri Ceyms F.Kenninin mayın 28-nin şəhərdə “Azərbaycanın Milli Günü” elan edilməsinə dair imzaladığı bəyannamə icmamıza təqdim olunub.
NTV canlı
Radio canlı
Nuhçıxan