Ərdoğan: Aİ-yə üzvlük yolunda Türkiyəyə qarşı siyasi baryerlər təcili aradan qaldırılmalıdır

Avropa İttifaqına (Aİ) üzvlük yolunda Türkiyəyə qarşı qoyulan siyasi baryerlər təcili olaraq aradan qaldırılmalıdır.

NTV  xəbər verir ki, bunu Türkiyə Prezidenti Rəcəb Tayyib Ərdoğan Şimali Kiprdən qayıdarkən təyyarədə jurnalistlərə açıqlamasında deyib.

O əlavə edib ki, Türkiyənin Avropa İttifaqına üzvlüyü ilə bağlı müzakirələrin irəli aparılması üçün bir gün belə gözləmək olmaz:

"Bu istiqamətdə irəliləyişə məhz indi nail olmaq lazımdır. Avropa İttifaqındakı bütün həmkarlarımıza bir daha bildiririk ki, biz tamhüquqlu üzvlüklə bağlı güclü öhdəliyimizi saxlayırıq. İttifaq bu məsələni strateji və uzaqgörən şəkildə həll etdikdən sonra onun təcili tədbirlər görməsinə heç bir maneə olmayacaq. Türkiyəyə qarşı qoyulan siyasi baryerlər təcili olaraq aradan qaldırılmalıdır. Biz Aİ ölkələrindən ədalətli yanaşma ilə münasibətləri davam etdirmələrini gözləyirik".

Türkiyə Prezidenti hesab edir ki, Avropada və onun ətrafında cərəyan edən hadisələr, Aİ daxilindəki fikir ayrılıqları, İttifaqın Türkiyə kimi dinamik və həllyönümlü üzvə ehtiyacı olduğunu göstərir:

"Türkiyə Aİ üçün körpünü keçməzdən əvvəl son çıxış yoludur. Köhnəlmiş siyasi perspektivlərin təsirindən qurtulmaq Avropa İttifaqı üçün yeni dövrü dərk etmək və onu gələcəyə aparmaq yolunda bir addım ola bilər. Türkiyə olaraq tam üzvlüyə hazırıq".