NTV xəbər verir ki, Naxçıvan Muxtar Respublikasının Fövqəladə Hallar Nazirliyi tərəfindən Dövlət Yanğından Mühafizə İdarəsinin Naxçıvan Şəhər Dövlət Yanğından Mühafizə Hissəsində 10 Oktyabr – yanğınsöndürənlərin peşə bayramı günü ilə əlaqədar “açıq qapı günü” tədbiri keçirilib.
Tədbirdə Naxçıvan şəhər 14 nömrəli tam orta məktəbin şagirdləri iştirak ediblər.
Tədbirin keçirilməsində məqsəd uşaqların hərtərəfli inkişafına, onların fiziki və mənəvi cəhətdən sağlam yetişməsinə, təhlükəsiz həyat fəaliyyəti mədəniyyətinin, eləcə də ilkin yanğın təhlükəsizliyi biliklərinin formalaşmasına və yanğınsöndürənlərin peşə fəaliyyəti barədə məlumatlılıq səviyyəsinin artırılmasına kömək etmək olub.
“Açıq qapı günü” tədbirində iştirakçılara yanğınsöndürənlərin gündəlik rejimi və hissənin fəaliyyəti haqqında ətraflı məlumat verilib, ilkin yanğınsöndürmə vasitələrindən istifadə qaydaları və əməkdaşların gündəlik məşqlərinin bir hissəsi əyani şəkildə nümayiş etdirilib. Həmçinin, uşaqlar fövqəladə hallar zamanı istifadə olunan zəruri yanğınsöndürmə və digər qəza-xilasetmə texnika və avadanlıqları ilə yaxından tanış olub, fövqəladə hadisələr zamanı təhlükəsiz davranış qaydaları barədə məlumatlandırılıblar.
Maraqlı keçən tədbirdə uşaqları maraqlandıran suallar cavablandırılıb.
NTV canlı
Radio canlı
Nuhçıxan