NTV xəbır verir ki, 9 oktyabr – Ümumdünya Poçt Günü münasibətilə Naxçıvan Muxtar Respublikası Rəqəmsal İnkişaf və Nəqliyyat Nazirliyinin tabeliyindəki “Naxçıvan Poçt və Telekommunikasiya Mərkəzi” MMC tərəfindən “Məktubdan rəqəmsal dünyaya – poçtun keçdiyi yol” adlı tədbir keçirilib.
Əvvəlcə qonaqlar Naxçıvanda poçtun tarixini əks etdirən fotoşəkillərdən və müxtəlif illərdə buraxılmış poçt markalarından ibarət sərgi ilə tanış olublar.
Tədbirdə Naxçıvan Muxtar Respublikasının rəqəmsal inkişaf və nəqliyyat nazirinin müavini, nazir vəzifələrini müvəqqəti icra edən Azər Məmmədrəhimov Ümumdünya Poçt Günü münasibətilə əməkdaşları təbrik edərək, poçt xidmətlərinin müasir dövrdə əhəmiyyətini vurğulayıb. Rəqəmsal texnologiyaların inkişafı fonunda poçt xidmətlərinin yeni tələblərə uyğunlaşdırılmasının vacibliyini qeyd edib. Kənd poçt şöbələrinin “Rəqəmsal Bilik və Bacarıqlar Mərkəzi” kimi fəaliyyət göstərməsi təşəbbüsündən danışaraq, bu istiqamətdə əməkdaşların rolunu xüsusi vurğulayıb. Sonda poçt sahəsində çalışan əməkdaşlara əməklərinə görə təşəkkür edib, onlara uğurlar arzulayıb.
Mərkəzin direktoru Hüseyn Əsgərli çıxışında Azərbaycanda poçt rabitəsinin tarixinə toxunaraq, sahədə son dövrdə həyata keçirilən təşkilati yeniliklər və əldə olunan nəticələr barədə məlumat verib. O, üç qurumun vahid strukturda birləşdirilməsinin idarəetmənin təkmilləşdirilməsinə, mövcud resurslardan səmərəli istifadəyə və xidmət keyfiyyətinin artırılmasına imkan yaratdığını qeyd edib.
Direktor əməkdaşların peşə hazırlığının artırılması, rəqəmsal xidmətlərin genişləndirilməsi və telekommunikasiya infrastrukturunun inkişafı istiqamətində görülən işlərdən danışıb. O, həmçinin poçt sahəsində həyata keçirilməsi nəzərdə tutulan yeni layihələr, o cümlədən karqo xidmətlərinin inkişafı və xidmət çeşidinin genişləndirilməsi ilə bağlı planları diqqətə çatdırıb.
Sonra videoçarx nümayiş olunub. Videoçarxda Naxçıvanın müxtəlif bölgələrində çalışan poçt əməkdaşları gündəlik işlərindən danışıblar.
Tədbirdə Culfa rayonunun Ləkətağ kəndinin poçt əməkdaşı İntiqam Sadıqov və kollektivin ən gənc əməkdaşı Nərgiz Bağırlı xatirələrini və düşüncələrini bölüşüblər.
Tədbirdə fərqlənən əməkdaşlar təltif olunub.
Tədbirin bədii hissəsində Azərbaycan Respublikasının Əməkdar artisti Elçin Nağıyev və Prezident mükafatçısı Nicat Həsənov (skripka) çıxış ediblər. Onları Faiq Abbaszadə müşayiət edib.
Sonda xatirə şəkli çəkdirilib.
NTV canlı
Radio canlı
Nuhçıxan