Son 20 ildə dünyada plastik məhsullardan istifadə 234 milyon tondan 460 milyon tona yüksəlib - FOTOLAR

Türkiyənin Sıfır Tullantı Vəqfi plastik çirklənmə ilə mübarizəyə dair hazırladığı “Plastik Tullantılar Hesabatı”nı ictimaiyyətə təqdim edib.

NTV xəbər verir ki, İstanbulda keçirilən təqdimat mərasimində Sıfır Tullantı Vəqfinin prezidenti, COP31-in Yüksək Səviyyəli İqlim Çempionu Samed Ağırbaş və İstanbul valisi Davud Gül iştirak ediblər.

Tədbirdə hesabatın əsas nəticələri və Sıfır Tullantı konsepsiyası çərçivəsində həyata keçirilməsi nəzərdə tutulan layihələr barədə məlumat verilib.

Samed Ağırbaş bildirib ki, BMT-nin Sıfır Tullantı üzrə Yüksək Səviyyəli Şəxslərlə Məsləhət Şurasının sədri və Sıfır Tullantı Fondunun fəxri prezidenti Əminə Ərdoğanın təşəbbüsü ilə formalaşan Sıfır Tullantı hərəkatı tullantıların idarəolunmasından daha geniş məna daşıyır və istehsal, istehlak, eləcə də inkişaf modelinin təbiətlə uzlaşdırılmasını hədəfləyir.

Onun sözlərinə görə, dünyada plastik məhsullardan istifadə son 20 ildə 234 milyon tondan 460 milyon tona, plastik tullantıların həcmi isə 156 milyon tondan 353 milyon tona yüksəlib. Türkiyədə adambaşına illik plastik tullantı 48 kiloqram təşkil edir ki, bu da dünya orta göstəricisindən 44,9 faiz çoxdur.

Fond rəhbəri avqustun 31-dən sentyabrın 1-dək İstanbulda dövlət qurumları, universitetlər, qeyri-hökumət təşkilatları və mütəxəssislərin iştirakı ilə ölkə tarixində plastik tullantılar mövzusunda ən genişmiqyaslı forumun keçiriləcəyini bildirib. Onun nəticəsi olaraq uzunmüddətli Plastik Fəaliyyət Planı ictimaiyyətə təqdim olunacaq.

İstanbul valisi Davud Gül isə ətraf mühitin mühafizəsinin qlobal əhəmiyyət daşıdığını vurğulayaraq, Sıfır Tullantı hərəkatının Türkiyədə geniş ictimai dəstək qazandığını və İstanbulun bu istiqamətdə nümunəvi şəhərlərdən biri olduğunu qeyd edib.

Hesabatda qlobal plastik istehlakının rekord həddə çatdığı, plastik tullantıların cəmi 9 faizinin təkrar emal edildiyi bildirilir.

Sənəddə plastik çirklənmənin iqlim dəyişikliyi ilə mübarizənin əsas istiqamətlərindən biri olduğu vurğulanır, həmçinin Türkiyədə plastik tullantıların idarəolunmasının təkmilləşdirilməsi, təkrar emal infrastrukturunun gücləndirilməsi, rəsmi monitorinq sisteminin yaradılması və dövri iqtisadiyyatın inkişafı üçün yeddi əsas fəaliyyət istiqaməti təklif edilir.