2027-ci ildə süni intellektə qlobal xərclərin 4 trilyon dollardan çox olacağı gözlənilir

ABŞ-də yerləşən “Gartner” tədqiqat və konsaltinq şirkəti tərəfindən dərc edilən hesabata görə, süni intellekt (AI) texnologiyaları sürətli böyümə tempini qoruyub saxlayır. Bu kontekstdə qlobal AI xərclərinin builki 2,75 trilyon dollar səviyyəsindən 2027-ci ildə 47,5 faiz artaraq 4,05 trilyon dollara çatacağı gözlənilir.

NTV xarici mediaya istinadla xəbər verir ki, hesabata görə, gələn il ümumi xərclərin 59 faizinin data mərkəzləri və serverlər də daxil olmaqla AI infrastrukturuna ayrılacağı təxmin edilir. Bu sahədə xərclərin 2026-cı illə müqayisədə 53 faizdən çox artımla 2,4 trilyon dollara çatacağı proqnozlaşdırılır.

İnfrastruktur investisiyalarının ən böyük komponentini təşkil edən AI ilə optimallaşdırılmış serverlərə xərclərin 527,6 milyard dollardan 957,2 milyard dollara çatacağı təxmin edilir.

Digər əhəmiyyətli xərc kateqoriyalarına AI xidmətləri daxildir ki, onların da 29,5 faiz artımla 746 milyard dollara çatacağı gözlənilir. Belə ki, AI proqram təminatının 42 faiz artımla 649 milyard dollara və süni intellekt sahəsində kibertəhlükəsizliyin 69 faiz əlavə xərclə 86 milyard dollara çatacağı proqnozlaşdırılır.

“Gartner” tədqiqat qrupunun Con-Devid Lovelok istifadəçi tələblərinin gözləniləndən daha sürətlə genişləndiyini bildirib. O qeyd edib ki, süni intellekt tətbiqlərinin istifadəsi genişləndikcə, yeni modellərin öyrədilməsi üçün tələb olunan emal gücü də artır, O, kibertəhlükəsizlik xərclərinin çoxalmasını süni intellektin həm hücumları, həm də müdafiəni daha yaxşı təmin etmək qabiliyyəti ilə əlaqələndirir.

Digər tərəfdən, süni intellekt xərclərinin ümumi artım tempi 2028-ci ilə qədər bir qədər yavaşlayaraq təxminən 28 faizə çatacağı proqnozlaşdırılır.

“Gartner”in hesabatında yalnız süni intellekt məlumat mərkəzlərinə diqqət yetirən şirkətlərin investisiyaların qeyri-kafi gəlirliliyi səbəbindən 2030-cu ilə qədər risklərlə üzləşə biləcəyi barədə xəbərdarlıq edilir və eyni zamanda, böyük bulud provayderlərinin güclü gəlir axınları ilə mövcud investisiya templərini qoruya biləcəkləri vurğulanır.