Mərkəz rəisi: Enerji sektoru kibertəhdidlərin daha çox hədəfindədir

Azərbaycanda qanunvericiliyə görə 10 sahə kritik informasiya infrastrukturu sahəsi elan olunub. Onların içərisində enerji sektoru xüsusi yerə malikdir. Qlobal hesabatları izlədikdə görürük ki, enerji sektoru həmin sahələr arasında prioritet olaraq öndə dayanır. Çünki enerji resursları olmadan digər kritik sahələrin fəaliyyəti riskli, daha dəqiq desək fəaliyyətin pozulması riski yaranır. Yəni təsadüfi deyil ki, enerji sektoru kibertəhdidlərin daha çox hədəfindədir. Enerji sektorunda müxtəlif beynəlxalq mənbələrin hesabatlarına əsasən həftəlik 1000-dən çox ciddi hücumlar qeydə alınır. Qlobal səviyyədə bu tendensiyanın ciddi artımı müşahidə olunur.

NTV xəbər verir ki, bunu Dövlət Təhlükəsizliyi Xidmətinin (DTX) Milli Kibertəhlükəsizlik Mərkəzinin rəisi Davud Rüstəmov DTX-nin Milli Kibertəhlükəsizlik Mərkəzinin əsas tərəfdaşlığı ilə Azərbaycan Kibertəhlükəsizlik Təşkilatları Assosiasiyası tərəfindən Bakıda keçirilən “4-cü Milli Kibertəhlükəsizlik Forumu”nda çıxışı zamanı deyib.

“Daha bir ciddi məsələ APT hücumları ilə əlaqədardır. Yəni dövlətdəstəkli hücumlar olduqca təhlükəli hesab edilir. Bu, sıradan bir kiberhücum deyil, bu təhdid fəaliyyətinin arxasında xüsusi xidmət orqanları dayanır. Təhdidin bu növü kifayət qədər ciddi olmaqla və əsasən dövlətin kritik informasiya infrastrukturunu hədəf alır. Adətən bu təhdid aktorları hədəf sistemdə qalıcılığı, davamlılığı təmin etmək niyyətindədir. Belə kiberhücumlar təcrübəyə əsasən orta hesabla 200-300 gündən sonra aşkarlana bilir.

Milli Kibertəhlükəsizlik Mərkəzi olaraq fəaliyyətimizdə APT kiberhücumlarının araşdırılması təcrübəsi var. Belə kibertəhdidlərin kibertəhqiqatı zamanı xüsusi yanaşma tələb edilir və çox çətin məqamlarla üzləşirik. Müşahidələr təkcə kritik informasiya infrastrukturlarının deyil, onlarla əlaqəli olan digər sistemlərin də qorunmasının aktuallığını artırır. Bu növ kiberhücumlar bizə uzun illər müxtəlif ziyanlar, həmçinin maddi ziyanlar vura bilir. Əsasən əhalini mühüm təminatlardan məhrum edə bilər. Bu, sənaye sistemlərinin fəaliyyətinin dayandırılması, həssas xarakterli, həmçinin dövlət sirri təşkil edən məlumatların icazəsiz əldə olunmasına yönəlir. APT kiberhücumu, bir növ təxribatın bildiyimiz ənənəvi növlərinin onlayn vasitələrlə həyata keçirilməsidir. Azərbaycanın milli qanunvericilik aktlarında, xüsusilə Cinayət Məcəlləsi və Cinayət-Prosessual Məcəlləsində müvafiq dəyişikliklərlə artıq təxribat cinayətinin də miqyası genişləndirilmişdir. Ölkəmizdə müvafiq hüquq-mühafizə orqanları tərəfindən buna adekvat addımlar atılır. Məhz bu kimi səbəblərdən də biz Azərbaycanın kibertəhlükəsizlik indeksi üzrə reytinqlərinin davamlı yüksəldiyini görürük", - deyə D.Rüstəmov qeyd edib.