Britaniyada enerji haqları 7 faiz ucuzlaşacaq

Böyük Britaniyada enerji haqları aprel ayından etibarən 7 faiz ucuzlaşacaq.

NTV  BBC-yə istinadla xəbər verir ki, bu barədə ölkənin enerji bazarını tənzimləyən qurum olan “Ofgem” məlumat yayıb. Qərar hökumətin enerji ödənişləri ilə bağlı dəyişikliklərindən sonra qəbul edilib.

İngiltərə, Uels və Şotlandiyada yaşayan əhalinin demək olar ki, hamısı tarifindən asılı olmayaraq qiymətin endirilməsindən faydalanacaq. Lakin qənaətin məbləği ev təsərrüfatlarının enerji istifadəsindən asılı olaraq dəyişəcək.

Dəyişkən tariflərdə olan milyonlarla ailə üçün qaz və elektrik enerjisindən orta səviyyədə istifadə zamanı aylıq təxminən 10 funt sterlinq azalma gözlənilir. Bununla belə, enerji qiymətləri hələ də Ukraynadakı müharibədən əvvəlki dövrlə müqayisədə təxminən 30 faiz daha yüksəkdir. Eyni zamanda, əhalinin enerji borcları artıb və istehlakçılara əlavə qənaət imkanları üçün müxtəlif təklifləri müqayisə etmələri tövsiyə olunur.