Yaxın Şərqdə enerji istehsalı və nəqlində davam edən fasilələr enerji daşıyıcılarının və digər malların qiymətlərinin daha da artmasına səbəb ola bilər.
NTV xəbər verir ki, bunu Beynəlxalq Valyuta Fondunun (BVF) baş iqtisadçısı Silvana Tenreyro BVF və Dünya Bankının idarəetmə orqanlarının Banqkokda keçirilən payız iclasında bildirib.
Onun sözlərinə görə, Yaxın Şərqdə gərginliyin artması fonunda xam neftin, təbii qazın, dizel yanacağının və aviasiya yanacağının qiymətləri kəskin yüksəlib.
“Yaxın Şərqdə enerji istehsalı və nəqlində uzunmüddətli fasilələr daha böyük qiymət artımlarına səbəb ola bilər. Enerji bazarlarında tətbiq olunan müxtəlif tənzimləmə mexanizmləri indiyədək bu şokun təsirini azaltmağa kömək edib”, – deyə o vurğulayıb.
Tenreyro qeyd edib ki, enerji axınlarının istiqamətinin dəyişdirilməsi, digər ölkələrdə istehsalın artırılması, ehtiyatlardan istifadə, bərpa olunan enerji də daxil olmaqla alternativ mənbələrə keçid və enerji səmərəliliyinin yüksəldilməsi mənfi təsirləri məhdudlaşdırıb.
Onun sözlərinə görə, bu uyğunlaşma amilləri olmasaydı, cari ildə qlobal iqtisadi artım 3,1 faiz əvəzinə 2,5 faiz təşkil edərdi. Bununla belə, baş iqtisadçı bəzi mexanizmlərin, xüsusilə ehtiyatlardan istifadənin və enerji səmərəliliyinin artırılması imkanlarının tükənmək üzrə olduğunu bildirib.
NTV canlı
Radio canlı
Nuhçıxan