Rumıniyanın Mureş vilayətində yerləşən Sovata kurort şəhərində dünyanın müxtəlif bölgələrində yaşayan ayı növlərinə həsr olunmuş tematik park yaradılacaq. Layihənin ümumi dəyəri 2,5 milyon avro təşkil edir.
NTV xəbər verir ki, Rumıniyanın AGERPRES milli xəbər agentliyinin məlumatına görə, layihə Avropa İttifaqının maliyyə vəsaiti hesabına həyata keçiriləcək.
Sovata şəhərinin meri Fülöp Laslo Jolt bildirib ki, park keçmiş istixana kompleksinin yerləşdiyi ərazidə salınacaq. Məqsəd istifadəsiz qalmış sənaye ərazisini müasir turizm və istirahət məkanına çevirməkdir.
Parkda canlı heyvanlar saxlanılmayacaq. Bunun əvəzinə ziyarətçilərə qütb ayısı, panda və qonur ayı da daxil olmaqla müxtəlif ayı növlərinin yaşayış mühiti üçölçülü modellər, interaktiv qurğular və multimedia vasitəsilə təqdim ediləcək.
Layihəyə əsasən, parkın ərazisi yuxarıdan baxıldıqda ayı siluetini xatırladacaq. Burada sərgi salonları, video nümayiş məkanları və ailəvi istirahət zonaları yaradılacaq.
Şəhər rəhbərliyinin məlumatına görə, layihənin dörd-beş il ərzində başa çatdırılması nəzərdə tutulur.
Qeyd edək ki, Sovata Rumıniyanın məşhur kurort mərkəzlərindən biridir. Şəhərin əsas turizm rəmzlərindən biri müalicəvi xüsusiyyətləri ilə tanınan Ursu gölüdür.
NTV canlı
Radio canlı
Nuhçıxan