Sabah voleybol üzrə Azərbaycan çempionatının yeni mövsümünə start veriləcək

Sabah voleybol üzrə Azərbaycan çempionatının 2022-2023-cü il mövsümünə start veriləcək.

Naxçıvan televiziyası İnformasiya Agentliyi Azərbaycan Voleybol Federasiyasına istinadla xəbər verir ki, mövsüm kişi voleybolçular arasında Yüksək Liqanın debütant klubu “Xarıbülbül” və MOİK komandalarının oyunu ilə başlayacaq.

Görüş saat 14:00-da olacaq. Ardınca həm qadın, həm də kişi voleybolçuların çempionatlarının rəsmi açılış mərasimi təşkil olunacaq.

Ötən illərdən fərqli olaraq, bu il həm qadınların, həm də kişilərin çempionatı Yüksək Liqa adlanacaq. Qadınların yarışında “Azərreyl”, “Abşeron”, “Murov” və UNEC klubları çempion adı uğrunda mübarizə aparacaqlar. Kişilərin mübarizəsində isə MOİK, “Neftçi”, “Murov” və mədəniyyət paytaxtı Şuşanı təmsil edəcək “Xarıbülbül” qüvvəsini sınayacaq.

Qadın və kişi voleybolçuların yarışı 6 dövrədən ibarət olacaq. Əgər yekunda xallar bərabər olarsa, çempion qələbə sayına əsasən elan ediləcək.

Dekabrda, həmçinin qadın və kişi voleybolçular arasında I liqa yarışlarına start veriləcək.