Naxçıvan boksçusu beynəlxalq turnirin qalibi olub - FOTOLAR

Rumıniyanın Arad şəhərində gənc və yeniyetmə boksçular arasında “Dracula Open” beynəlxalq turniri keçirilib.

Naxçıvan Muxtar Respublikası Gənclər və İdman Nazirliyinin mətbuat xidmətindən Naxçıvan televiziyası İnformasiya Agentliyinə bildirilib ki, 25 ölkədən 361 idmançının mübarizə apardığı yarışda Azərbaycan millisi 7 qızıl, 3 gümüş və 8 bürünc medal qazanıb. Bu medallardan 11-nə yeniyetmə boksçularımız sahib olub.

Naxçıvan Boks Federasiyasının idmançısı Elbrus Kərimli yeniyetmələrin yarışında 54 kq çəki dərəcəsində mübarizə aparıb. Millimizin üzvü dörddəbir final mərhələsində Yulian Buletiçana (Rumıniya) 3:2 hesabı ilə qalib gəldikdən sonra yarımfinalda yunan Angelos Karaitisi aşkar üstünlüklə (5:0) məğlub edib. Finalda yerli idmançı Kladio Çeraliunu ilə görüşən Elbrus Kərimli bu dəfə də rinqi tam üstünlüklə tərk edib. Nəticədə idmançımız karyerasında ilk dəfə iştirak etdiyi beynəlxalq səviyyəli yarışı qızıl medalla tamamlayıb.